Arranque del despliegue y la gobernanza de Erabaki en Taupa Mugimendua

1. Ongietorria eta proiektuaren aurkezpena

Decidim softwarearen gainean eraikitako plataforma da Erabaki, eta partaidetza-azpiegitura komun gisa planteatzen da Taupa Mugimendurako: tresna digital bat baino gehiago, partaidetza-espazioak antolatzeko, dokumentatzeko eta haien jarraipena egiteko modu partekatu bat. Proiektuaren helburuak gogorarazi ziren:

• Erabaki Taupako partaidetza-azpiegitura komun bihurtzea.

• Gobernantza-, rol- eta funtzionamendu-eredu bat marraztea.

• Funtzionamendu-eredua benetako partaidetza-prozesu batean probatzea.

• Trazabilitatea eta itzulera hobetzea, eta aurrez aurreko eta online partaidetza hobeto lotzea.

• Ikaskuntzak eta oinarri berrerabilgarri bat sortzea, Erabaki Taupako beste prozesu batzuetara zabaltzeko.

Ondoren, prozesuaren talde bideratzailea aurkeztu zen: idazkaritza teknikoa eta dinamizazioa hartuko ditu bere gain. Gai-zerrenda ere errepasatu zen.

2. Zertarako erabili Erabaki Taupa Mugimenduan?

2.1. Balioen barometroa

Bost baieztapen eztabaidatu ziren, Erabaki txertatzeak sortzen dituen tentsioen inguruan:

1. Taupako partaidetza-espazio guztiek Erabaki erabili beharko lukete; erabiltzen ez dutenak salbuespena izan beharko lirateke.

2. Erabakik funtziona dezan, Taupako proiektuek eta lurraldeek beren autonomiaren zati bati uko egin eta arau komun batzuk onartu beharko dituzte epe laburrean.

3. Erabakik aurrezten diguna baino lan gehiago sortzen badu, ez dugu erabili behar, trazabilitatea eta gardentasuna hobetzen baditu ere.

4. Erabakitik kanpo gertatzen den partaidetza esanguratsua Erabakin jasotzen ez bada, ez genuke prozesua behar bezala dokumentatutzat jo behar.

5. Sei hilabete barru Taupak ezin badu Erabakin beste partaidetza-espazio bat talde bideratzailearen laguntzarik gabe abian jarri, pilotuak ez du bere helburua bete.

Dinamikaren helburua ez zen akordioak ixtea, baizik eta dauden jarrerak agerian jartzea. Jarrera horiek izan ziren arrakasta-irizpideen abiapuntua.

2.2. Mirariaren galdera eta arrakasta-irizpideak

«Imajinatu sei hilabete igaro direla eta Erabakik benetan ondo funtzionatu duela. Zer gertatu beharko litzateke Taupan hori frogatu ahal izateko? Idatzi sei hilabete barru argi eta garbi erantzun ahal izateko moduan: “bai, hau gertatu da” edo “ez, hau ez da gertatu”.»

Erantzunetatik bederatzi adierazle atera dira, proiektuaren amaieran ebaluazioa egiteko:

1. Herri Ituna pilotua martxan eta frogatuta dago. Erabakin abian jarri da, ondo funtzionatu du eta piloturako ezarritako helburu nagusiak bete ditu.

2. Herri Ituna diseinatzeko, abiatzeko eta jarraipena egiteko mekanismoak zehaztuta daude, metodologikoak zein operatiboak.

3. Aurrez aurreko eta online partaidetza modu erabilgarrian uztartu dira. Bi kanaletan sortutako ekarpenak prozesu berean txertatu dira.

4. Erabaki erabilgarria, ulergarria eta erabilerraza da. Parte-hartzaileek hala baloratzen dute, eta plataformak ez du parte hartzeko oztopo berririk sortzen.

5. Herri Itunak partaidetza-maila esanguratsua lortu du. Herritarren eta eragileen inplikazioa neurtzeko adierazle zehatzak ezarri dira.

6. Taupako lantaldea gai da Erabaki bere kabuz erabiltzeko. Plataformaren funtzionamendua eta aukerak ezagutzen ditu, eta partaidetza-espazio berriak sortu, konfiguratu eta kudeatzeko gaitasuna du.

7. Taupak argi du Erabaki zertarako eta nola erabili nahi duen. Mugimenduan erabiltzeko lehen irizpide eta ibilbide komunak daude.

8. Erabakiren erabilerari buruzko hausnarketa mugimenduan zabaldu da. Taupako beste talde, bazkide eta eragileekin landu da tresna beren beharretara nola egokitu.

9. Elgoibarko esperientzia erreferentzia bihurtu da Tauparentzat. Bertako ikaskuntzak jaso eta antolatu dira, beste partaidetza-espazio batzuetan baliatzeko.

3. Hedapen-prozesuaren aurkezpena

Plataforman argitaratutako prozesua aurkeztu zen (https://erabaki.taupamugimendua.eus/processes/erabaki-diseinua), eta galderen txanda ireki zen.

3.1. Zer da prozesu hau?

Erabakiren hedapenaren diseinua (2026/08/15–2027/02/14) ez da Herri Ituna: Erabakiren gobernantza- eta hedapen-prozesua da. Pilotuari laguntzen dio eta haren jarraipena egiten du, beharrak hautemateko eta gobernantza, administrazioa, trazabilitatea eta aurrez aurreko zein online partaidetzaren arteko lotura doitzeko. Herri Itunak bere lekua izango du Erabakin.

• Erabakiak hartzea: gidaritza-taldeak kontrastatu eta hartzen ditu; talde bideratzaileak idazkaritza teknikoa egiten du; Taupako kideek proposamenak egin ditzakete. Prozesua publikoa da.

• Faseak: abian jartzea eta gobernantza (2026/08/15–09/30); pilotuaren hedapena eta jarraipena (2026/10/01–2027/01/15); ebaluazioa, transferentzia eta itxiera (2027/01/16–02/14).

• Erabakiren osagaiak: gobernantzaren orria, topaketak, proposamenak (gobernantzari, erabilera-arauei, administrazioari eta jarraipenari buruzko hobekuntzak; fase honetan ez da teknikoki egiaztatuko Taupako kide izatea) eta bloga.

3.2. Egindako galderak

• Nor sar daiteke partaidetza-espazio bakoitzean? Elgoibarkoan, adibidez, herrikoek soilik? Taupan, autentifikazioak esaten du nor den parte-hartzailea (parte-hartzaile-izena eta pasahitza edo Google kontua), eta baimenek zehazten dute zer prozesutan sar daitekeen eta zer egin dezakeen. Sarrera librea izan daiteke edo mugatua: eskuz alta emanda, baimendutakoen zerrenda baten bidez (bazkideena, adibidez) edo erroldaren bidez, Udalaren laguntza teknikoarekin. Espazio pribatuak baimena dutenek bakarrik ikus eta erabil ditzakete. Herri Itunean nork parte har dezakeen zabalik dago oraindik . Barne-gobernantzako gaiak, berriz, konfidentzialak dira, eta dagozkien baimenekin kudeatu beharko dira.

• Hizkuntza: plataforma lehenespenez euskaraz agertzen da, eta parte-hartzaile bakoitzak gaztelaniara edo frantsesera alda dezake. Interfazearen itzulpenak itzultzaileek egiten dituzte, horretarako tresna baten bidez.

Aurkezpenaren ondoren, taldeak Erabaki tresna soil gisa ikusteari utzi eta Taupako esparru bakoitzean zertarako balio dezakeen irudikatzen hasi zen.

4. Erabakiren printzipioak Taupan

Asmoa ez zen Herri Ituna diseinatzea, baizik eta Erabakik Taupako edozein partaidetza-espaziotan bete beharreko printzipioak zehaztea. Binaka aritu ziren: hogei minutu hasierako bost printzipioak lantzeko, eta beste hamabost falta zirenak atzemateko.

4.1. Gardentasuna

• Erabakin beti argi egon behar du prozesua kontsultiboa ala loteslea den, nor den parte-hartzailea (aplikazioaren bidez edo bestela), nork edo zerk erabakitzen duen eta zein izan den emaitza. Emaitzaren itzulera egin behar da.

• Prozesu guztien helburua ez da erabakiak hartzea: batzuk informatiboak izan daitezke, eta beste batzuek bestelako funtzioa bete dezakete.

• Plataformaren printzipioez gain, prozesu bakoitzak bere joko-arauak izango ditu.

• Erabakitakoaren eragina geroago ere jakinarazi behar da; horretarako, Decidimen emaitzen jarraipenerako osagaia erabil daiteke.

4.2. Trazabilitatea

• Erabakin, edonork erraz jarraitu ahal izan behar dio bere ekarpenaren eta gainerakoen ibilbideari.

• Ekarpenak onartzeko edo baztertzeko irizpideak ikusgai egongo dira.

4.3. Errespetua

• Parte-hartzaile orok nahi duena esateko eskubidea du, pertsonen oinarrizko eskubideak kaltetzen ez baditu.

• Partaidetzak ez du inor diskriminatuko jatorria, etnia, hizkuntza, generoa, identitatea, joera sexuala, arraza, klase soziala edo iritzi ezberdinak direla-eta.

• Iruzkin arrazistak edo printzipio horien aurkakoak salatu ahal izango dira, administrazioak neurriak har ditzan.

4.4. Hizkuntza

• Bakoitzak ulertzen duen hizkuntzan jaso behar du informazioa, eta nahi duen hizkuntzan egin ekarpena; hautatutako hizkuntza edozein dela ere, ekarpena berdin kontuan hartuko da.

• Hizkuntza-irizpideak partaidetza-prozesuaren arabera ezarriko dira.

• Argi adierazi behar da euskara dela Erabakiren funtzionamendurako hizkuntza nagusia.

• Printzipioetan ez da erantzun-eperik zehaztuko; barne-mekanismoak aurreikusiko dira, hala nola itzulpenetarako hitzarmenak komunitateekin edo erakunde aliatuekin.

4.5. Komunikazioa eta irisgarritasuna

• Ekarpena balio berean erregistratuko da, aurrez aurre nahiz online egina izan.

• Ulergarritasuna ere bermatu behar da: hizkera argia eta erraza erabiltzea, baita euskara lehen hizkuntza ez dutenentzat ere.

• Irisgarritasuna parte hartzeko benetako aukera gisa ulertu behar da: arrakala digitalaz gain, badira beste batzuk ere, prekarietatea kasu, eta aurrez aurreko espazioak jendearengandik hurbil kokatu behar dira.

4.6. Nork parte har dezakeen (galdera irekia)

• Partaidetza erroldara ez mugatzea: badira erroldatu gabeko bizilagunak eta eragile aktiboak, esaterako ikastetxeetakoak, Elgoibarren bizi ez arren Herri Itunean parte hartu dutenak.

• «Elgoibarko Herri Itunean Elgoibarrekin edo prozesuarekin lotura duen edonork parte har dezake» formulazioa planteatu zen: mugatu baino gehiago gonbidatzen duela baloratu zen, baina gutxieneko lotura bat eskatzea komeni da, eta prozesu lotesleetan baliteke gehiago mugatu behar izatea.

• Irizpide horrek printzipio berri baterantz jotzen du: idatzi eta gainerako printzipioekin batera txertatu beharko da.

Hurrengo urratsa: talde bideratzaileak printzipioak idatzi eta plataforman argitaratuko ditu, kontrastatzeko. Lehen oinarri bat dira, pilotuan zehar berrikus daitekeena.

5. Gobernantza-arloak

Talde bideratzaileak Erabakiren gobernantza antolatzeko lehen proposamen bat aurkeztu zuen, lau arlotan egituratuta:

• Komunikazioa: zer eta noiz argitaratzen den, informazioa eguneratzea, Taupako kanalekiko konexioa eta parte-hartzaileei itzulera.

• Metodologia eta dinamizazioa: partaidetza-espazioen diseinua, aurrez aurreko eta online partaidetzaren uztarketa, ekarpenen bilketa, moderazioa, laguntza eta itzulera.

• Azpiegitura digitalak: konfigurazioa, funtzionamendu teknikoa, gorabeherak, hobekuntzak eta erabiltzaileei zein administratzaileei ematen zaien laguntza.

• Zuzendaritza estrategikoa: Erabaki zertarako eta zein espaziotan erabiliko den, irizpide komunak, Herri Itunari buruzko irakaspenak eta etorkizuneko hedapena.

Arlo horiek garatzeko, baliabide hauek proposatu ziren:

• Prestakuntza: batez ere bilera laburren eta lan praktikoaren bidez; behar zehatzak pilotuan zehar antzemango dira.

• Plataformaren kudeaketa: espazioak, faseak, edukiak eta osagaiak kudeatzeko barne-gaitasunak. Pilotuak Taupak bere gain har ditzakeen zereginak eta laguntza behar dutenak erakutsiko ditu.

• Laguntza teknikoa: metodologia parte-hartzailean eta konfigurazioan, pixkanaka autonomia irabazteko helburuarekin.

• Koordinazioa: hiru saio orokor, Herri Itunaren jarraipeneko bilera laburrak, saio monografikoak eta noizbehinkako laguntza teknikoa.

Taupak adierazi zuen arlo horiek oraindik argitu gabe daudela, eta arloen artean gainjartzerik edo bikoiztasunik ote dagoen galdetu zuen. Arduradunak, erabakitzeko gaitasuna eta arloen arteko harremana zehaztu gabe daude, eta denbora eta prozesu gehiago beharko dira horretarako. Gai hori lantzeko proposamena: Gobernantza-arloen arduradunak eta erabakitzeko gaitasuna.

6. Herri Itunaren diseinu parte-hartzailea

Herri Itunaren ibilbidea lantzeko panel bat erabili zen, bi galderaren inguruan: zer gertatzen den eta zein kanaletatik. Bi talderen ikuspegitik aztertu zen: batetik, eragile antolatuak (erakundeak, elkarteak eta gainerakoak); bestetik, banaka parte hartzen duten herritarrak. Helburua ibilbidea argitzea zen, gero Erabakin izan beharreko faseak eta egitura zehaztu ahal izateko.

Diseinua espero baino korapilatsuagoa izan zen, besteak beste parte-hartzaile guztiek ez zutelako Herri Itunaren aurreko ibilbidea neurri berean ezagutzen; hala, saioan ez ziren faseak eta osagaiak zehaztu. Ondorio nagusia: plataforma konfiguratu aurretik argitu behar da zer gertatzea nahi den → nork parte hartzen duen → nola → zertarako, eta, azkenik, hori nola irudikatzen den Erabakin. Talde bideratzaileak ere ondorioztatu zuen dinamika anbiziotsuegia izan zela talde handian lantzeko. Jasotako ekarpenak 6.1etik 6.3ra bildu dira.

6.1. Ibilbidearen egitura

Ibilbidea ez da bi taldeentzat paraleloan egiten: lehenik eragileekin egiten da lan; abenduaren 3a mugarri garrantzitsua da; eta hortik aurrera hasten da herritarren ibilbidea, bere logika eta kanal propioekin.

Eragileak: 1 Ezagutu → 2 Ulertu → 3 Parte hartu → 4 Konpromisoak hartu → 5 Abenduaren 3a → 6 Jarraipena

Herritarrak (abenduaren 3tik aurrera): 1 Ezagutu → 2 Ulertu → 3 Parte hartu → 4 Konpromisoak hartu → 5 Jarraipena

6.2. Eragileen ibilbidea

1. Nola ezagutzen dute Herri Ituna?

• Eragileei bisita zuzenak egingo zaizkie lehentasun-ordenaren arabera. Bisitak erakunde bakoitzean erabakitzeko gaitasuna duten pertsonei zuzenduko zaizkie; eragile batzuk abenduaren 3a baino lehen landuko dira, eta beste batzuk ondoren.

• Bisiten osagarri, komunikazio-kanpaina bat egingo da, Herri Ituna ikusgai eta erreferente bihurtzeko.

• Dagoeneko parte hartu duten eragileek barne-lana egiteko materiala eta argibide zehatzak behar dituzte: nora jo eta zein den hurrengo urratsa.

2. Nola ulertzen dute?

• Helburu komunitarioa beren egiten dute, eta ekarpen aktiboak egiteko tresnatzat hartzen; ez kanpotik datorren eta atxikimendua besterik eskatzen ez duen ekimentzat.

3. Nola hartzen dute parte?

• Barne-lanketa baten bidez: bertan adosten dituzte hartu nahi dituzten konpromisoak, eta ondoren Erabakin jasotzen dituzte.

4. Nola hartzen dute konpromisoa?

• Konpromisoa erakundearen barne-organoetan lantzen da, behar izanez gero aholkularitzarekin, eta gero Erabakira eramaten da. Eragile batzuek urrian egin dezakete hori.

5. Abenduaren 3a

• Ilusioa pizteko, eragileak ikusgai jarri eta erreferente bihurtzeko, eta Herri Itunaren izaera kolektiboa sendotzeko unea.

• Herritarren ibilbideari bide ematen dio. Ez da Herri Itunaren amaiera.

• Oraindik zehaztu gabe dago noiz hasten den konpromisoen etapa, zenbat lan egin behar den data horren aurretik eta zer etorriko den ondoren. Gai hori zehazteko proposamena: Abenduaren 3aren aurreko eta ondorengo egutegia.

6. Nola egiten diote jarraipena?

• Berrikuspen-mugarriak konpromisoen eskemarekin → berrikuspena → emaitzak → komunikazioa → jarraipena: zer onartu eta bete den, zer emaitza dauden eta zer aldatu behar den.

• Baldintzek lotune gisa funtzionatzen dute: baldintza berean konpromisoak dituzten eragileek jarraipen bateratua egin dezakete.

• Herri Ituna tresna bizia da, eta hamar urtera begira dago. Jarraipenak oraindik konprometitu ez direnen bila joateko ere balio du («akuilu lana»).

6.3. Herritarren ibilbidea abenduaren 3tik aurrera

1. Nola ezagutzen dute Herri Ituna?

• Herri Ituna modu zabalean ezagutaraztea, etxez etxeko banaketaren eta tokiko hedabideen bidez, abenduaren 3ko ekitaldia abiapuntu hartuta.

2. Nola ulertzen dute?

• Konpromisoak hartzeko gida laburra eta parte hartzeko azalpen argia.

3. Nola hartzen dute parte?

• Tresna digitala euskarri fisikoko itunarekin eta aurrez aurreko partaidetzarekin uztartuz.

4. Nola hartzen dute konpromisoa?

• Proposatutako konpromisoen artean hautatuz edo beste batzuk proposatuz. Atxikimenduarekin duen lotura zehaztu gabe dago.

5. Nola egiten diote jarraipena?

• Konpromisoen orri pertsonala eta horiek ebaluatzeko tresna, Tauparen gogorarazpenekin eta jarraipen-baliabideekin.

• Herritarrek eragileen konpromisoen jarraipena egiteko tresna, eta konpromisoei buruzko datu nagusiak argitaratzea.

6.4. Batera Jauzi eta Herri Itunaren arkitektura

Dinamikan, «fase» hitza ez zen beti zentzu berean erabili: fasetzat aurkeztutakoa elkarren segidako prozesu gisa ere uler daiteke.

Geroago, talde bideratzaileak eta Batera Jauziko arduradunek izandako solasaldi batean (osoko bilkuran aztertu gabea eta kontrastatzeko dagoena), Batera Jauzi prozesua Erabakin dokumentatzea planteatu zen. Egitura hau izango litzateke:

• Aurreko bi prozesuak: bata, baldintzen eraikuntza eta akordioari buruzkoa, eta bestea, baldintza horien sozializazioari eta konpromisoen zehaztapenari buruzkoa.

• Herri Ituna batzar edo lanerako gune iraunkor gisa: Elgoibarren horrela ulertzea, eta ez hasiera eta amaiera zehatzak dituen prozesu modura. Jarraipena egingo luke, konpromisoak berrikusiko lituzke, inplikatutako eragile eta pertsonak bilduko lituzke eta prozesu berriak bultzatuko lituzke (hezkuntzari edo kirolari buruzkoak, adibidez). Taupak udalerri bakoitzean batzar bat izatea nahi du.

Batera Jauziko arduradunek urte hauetan sortutako dokumentazio guztia ekarriko dute, baldintzak eta konpromisoak barne. Dokumentazio hori abiapuntu hartuta, argitu beharko da zer prozesu dauden eta zer fase izan dituzten, etapa bakoitzaren helburua eta mugak zein diren, zer den behin-behinekoa eta zer egonkorra, eta zein den Elgoibarko talde motorraren zeregina. Oraingoz ez da Herri Itunaren fase berririk zehaztuko: lehen urratsa orain arteko prozesuak eta faseak Erabakin dokumentatzea eta egituratzea da. Lotutako proposamena: Herri Itunaren arkitektura Erabakin.

6.5. Batera Elgoibarren: aurrekariak

Herri Ituna ez da hutsetik abiatzen: Elgoibarren Batera Jauzik 2024ko azaroan hasitako ibilbidearen egungo etapa da.

• 1. fasea: hamar saio — bost Elkarrizketa Talde Eragilearekin (ETE, 18 pertsona) eta bost kontraste-talderekin (hezkuntza, sozioekonomia, kulturgintza, gazteak eta kirola, euskaraz ez dakiten herritarrak). Emaitza: zortzi baldintza adostuta.

• 2. fasea: bederatzi edo hamar saio (hiru talde berarekin, jarraipeneko saio bat, baldintza bakoitzeko bat eta topaketa bat). Amaitzear dago.

Dena dokumentatuta dago: aktak, bertaratzeak eta erabakiak. Arrigorriagan, berriz, prozesua 2. fasean dago.

Aurrekariek ez dute balio dagoeneko adostutakoa (baldintzak, esaterako) berriro irekitzeko, baizik eta Herri Ituna nondik datorren azaltzeko: zer egin zen → zer adostu zen → nola iritsi den egungo etapara.

6.6. Erabaki, prozesuaren memoria gisa

Eragileekin egindako bilerak, bisitak, topaketak, mugarriak eta berrikuspenak Erabakin erregistra daitezke, eta kontakizun jarraitu bat osatzen duten artikulu txiki bihurtu: bilera → erregistroa → artikulua → jarraipen publikoa. Hala, Erabaki ez da partaidetza-espazio bat bakarrik: prozesuaren memoria eta artxibo publikoa ere bada.

6.7. Prototipoa

Probako plataforma batean lan egingo da. Bertan, taldeak behin betiko konfigurazioa finkatu aurretik sartu, akatsak egin, edukiak kargatu eta funtzionamendua ulertu ahal izango du, eta ikusiko du nolakoa izango litzatekeen Herri Ituna, aurrekarien zati bat barne.

6.8. Atxikimendua

Lehentasunezko gai irekia da. Zehaztu behar da zer esan nahi duen atxikitzeak, nork egin dezakeen, zeri egiten zaion (itunari, baldintza bati edo konpromiso bati), zer formalitaterekin, nola egiten den publiko eta nola lotzen den konpromisoekin. Irtenbidea Decidimek dagoeneko eskaintzen dituen aukeren barruan bilatu beharko da, neurrira egindako garapenik gabe. Gai hori lantzeko proposamena: Atxikimendua zer den eta Decidimen nola egin.

6.9. Elgoibarko talde motorra

Elgoibarko Udalak (euskara teknikaria eta alderdi politikoetako zinegotziak), Elgoibarko Izarrak eta Taupak osatzen dute. Bi astean behin biltzen da, lan operatiboa egiteko (jarduerak prestatu eta parte-hartzaileak koordinatu), eta ez erabaki estrategikoak hartzeko. Bilerak eta aktak Erabakin erregistratzea proposatzen da; plataforma erabiltzen ikasteko ere balioko luke.

6.10. Errepikagarritasuna

Etorkizuneko Herri Itunetan, Erabakik hasieratik har dezake parte, bilerak, ekarpenak, kontrasteak eta akordioak erregistratzeko. Horretarako, metodologia egokitu beharko da, eta dokumentazioari denbora propioa eskaini.

7. Erabakiren eta komunikazioaren aurkezpen publikoa

7.1. Tauparen komunikazio korporatiboa

• Erabaki gizarte-oinarriari noiz eta nola aurkeztu, eta beste kanpaina batzuekin nola lotu. Udaberrian, Taupak mugimenduaren erronkei buruzko une bat aurreikusten du, eta han aurkez dezake Erabaki, taupakideentzat parte hartzeko modu berri gisa; urteurrenarekin ere lotu daiteke.

• Nazio mailako komunikazioa ez da Elgoibarko egutegiaren araberakoa izango.

Zeregina: Tauparen webgunean Erabakirako sarbidea jartzea (botoia edo esteka). Zehaztu gabe dago nork hartzen duen bere gain komunikazio korporatiboa eta nork prozesu bakoitzarena.

7.2. Herri Itunaren komunikazioa

Herri Itunaren komunikazioak zer gertatzen den azaldu behar du, eragileak eta herritarrak aktibatu, eta aurrerapenak eta emaitzak jakinarazi . Taupako komunikazio-taldea bat dator irizpide horrekin: albistea ez da Erabaki erabiltzen hastea, Taupak plataformarekin egiten duena baizik. Hobe da «Herri Ituna abian jarri dugu, eta Erabaki erabiltzen ari gara hura garatzeko» esatea, tresna berri bat iragartzea baino.

7.3. Decidim Fest

Talde bideratzaileak proposatu du Taupak Decidim Festeko mahai batean parte hartzea (seguruenik Bartzelonan, urriko azken astean), Taupa zer den eta Erabaki nola erabili nahi duen azaltzeko eta beste esperientzia batzuk ezagutzeko. Taupak erabaki beharko du parte hartuko duen ala ez.

8. Egutegia eta hurrengo urratsak

Berehalako lana

• Taupak landutakoa Elgoibarko talde motorrari helaraziko dio (irailaren 11ko bilera); plataforma azaltzeko online saio labur bat baloratuko da.

• Batera Jauziko arduradunek beren dokumentazioa bidaliko dute, faseak, helburuak eta azpiproiektuak jasotzen dituen dokumentu batekin batera.

• Talde bideratzaileak informazioa ordenatuko du, Herri Itunaren ibilbidea Erabakiko egitura batera eramango du eta prototipoan kargatuko du, Taupako taldeak proba dezan.

Egutegia

• 2026ko irailaren 29a: Herri Itunaren diseinua zehazteko bilera teknikoa talde txiki batekin. Aurretik, talde bideratzaileak diseinuaren lehen bertsioa Erabakira igoko du, Taupak berrikus dezan.

• Sprintak: 30 minutuko bilera operatiboak astelehenetan, 10:00etatik 10:30era, urriaren 5etik aurrera. Astean behin egingo dira, eta talde bideratzaileak eta Batera Jauziko arduradunek parte hartuko dute.

• 2026ko azaroaren 18a: bigarren saio orokorra (azaroaren 12aren ordez).

• 2027ko urtarrilaren 28a: itxiera- eta ebaluazio-saioa.

9. Itxiera: hitz bat

Parte-hartzaile bakoitzak hitz batean laburtu zuen saioa, eta hitz horiekin osatu da esaldi hau:

«Saio honetatik kokatuago eta kokatuta goaz, agian lanpetuago eta urduri ere bai; baina batez ere ulertuago, argituta eta bideratuta, etxeko lanak aurrean ditugula, jakin-minez, pentsakor eta inspiratuta, datorrenari forma ematen jarraitzeko.»